Mannheim

Moi Lieblingswørd Gewinnspiel läuft noch bis 30. Dezember – Dialekt Lieblingswörter können eingeschickt werden / Bereits über 500 Einsendungen

Vunn „Abblgrutze“ bis „zabbäduuschder“

Archivartikel

Nää Ihr Leit,

was Sachä – unn känn Schrønk! S’reißt nädd ab midd Eire goldischä Ideä im Dialekt-Wettbewerb „Moi Lieblingswørd“. Letsch Woch hawwisch Eisch fazehlt, dass vunn A bis Z, also vunn „Alla“ bis „Zuggerschnuud“, so Oinisches oigschiggt worrä iss, was unnsa Muddaschproch zu biedä hodd.

Heid mach isch grad alphabetisch weida – unn zwa vunn „Abblgrutze“ bis „zabbäduuschda“. Ob ma dess dønn a so schreibt odda doch liewa „zappeduschder“, schpielt ga kä Roll, genau wie beim „Abblgrutze, „Abblgrudsä“ odda „Abbelgruze“. Jeda wie a kønn unn will – unn wiema bei ma ihm dehääm sagä duud. Dess iss jo dess Schänä, dass so ä „Mund-Art“ ä eschdi Goschäkunscht iss, midd gønz unnaschiedlischä Färwungä unn mikrolokale Laut- unn Bedeitungsverschiewungä, wønnda wissd wass isch mähn.

Wie gsacht, ma kønn noch middmachä – unn ihr habbd jo dess Johr iwwa die Woinachdä genug Zeit zum Redzlä khappt. Øn quasi glei drei Feiadeeg hosch nädd ins Theada odda Kinno gekännt, in die Wärdschaft a nädd, unn middlaweil kønnsch näddämol in die Käärsch. Die Woinachdä war dess Johr ä traurischi Sach, ihr Leit. Sogaa die bugglisch Fawøndschaft iss dehääm gebliwwä – nädd wegä de Helga ihre fabrenndä Gøns, sunnan gønz äfach wegä Corøna. Was habbda dønn do gemacht? – Lieblingswerda oischiggd! So iss räschd!

Wønna noch frei habt unn dehääm gemietlisch beinønna hockt – nadierlisch bloß im erlaubtä Røhmä – kennda noch in alla Ruh iwwa unsa Schprooch noochdenkä. Ausdrigg, die eisch ä Hoimatgfihl gewwä, dänna ma øheert, wo se dehääm sinn.

Dass ihr dess kännd, weeß isch, wie mit bisher iwwa 400 Oisendungä zu sehe iss. Uff gut Deitsch: Unnsan Fundus, än eschdä Wortschatz, wärd imma greeßa! Wachsä solla, fallorä därfa nädd gehä – unn dodäfir brauch de Kall Eisch, Ihr liewe Leit.

Awwa weil isch weeß, dasses fer umme nix gibt, hamma Preise ausgschriwwä. Ihr wissd jo längschd a, dasses a wass zwischä die Kiemä gibt, also Gewinnä, die Leib unn Seel zusømmähaldä – unn dess kønn ma derzeit wahrhaftisch brauchä! Alla, haud in die Taschdä odda schreibts uff än Zettl – unn schiggts heer, elektrisch odda middä Poschd, gønz wiea wolld.

Zum Thema